Vel heppnað vorþing
12.05.2014
Á heimleiðinni áðu Mý og Betakonur við Litla Bæ í Skötufirði
Dr. Svava Pétursdóttir fjallaði um uppýsingatækni í skólastarfi frá ýmsum hliðum. Fróðlegt var að heyra hvernig
samfélagsmiðlar geta nýst í skólastarfi og að kynnast því hvernig miðill eins og Facebook getur verið vettvangur þar sem kennarar
styðja hvern annan í starfi. Á þessari slóð eru glærur Svövu.
Jóna Benediktsdóttir aðstoðarskólastjóri og Guðríður Sigurðardóttir kennari sem báðar starfa við Grunnskólann
á Ísafirði sögðu frá nemendaþingi sem haldið var við skólann. Áhugavert var að heyra hvernig staðið var að þinginu,
því fylgt eftir og síðan unnið úr því. Það verður fróðlegt að fylgjast með þróun þessa verkefnis
í framtíðinni.
Albertína F. Elíasdóttir verkefnisstjóri FabLab á Ísafirði sagði frá
möguleikum FabLab smiðjunnar til að skapa og hanna hluti frá upphafi til enda. Í erindinu sýndi hún einnig hluti sem hafa orðið til í
smiðjunni. Ljóst er að FabLab eru engin takmörk sett.
Síðasta erindi dagsins hélt Elsa María Thompson skólastjóri heilsuleikskólans Laufáss á Þingeyri. Hún sagði
frá skólastarfinu og fjölbreyttu samstarfi hans við grunnskólann á Þingeyri og aðra leikskóla í Ísafjarðarbæ.
Í lok dagsins var svo boðið uppá tvenns konar sögugöngur sem báðar enduðu í Safnahúsinu á Ísafirði þar sem
Iota konur voru með stutta móttöku. Í lok dagsins borðuðu konur saman í Tjöruhúsinu, hlýddu á söng og sungu saman.
Mý- og Betakonur þakka bæði Iotakonum og menntamálanefnd landssambandsins fyrir fræðandi og skemmtilegt vorþing.
Myndir frá vorþinginu er hægt að skoða á vef Betadeildar.
