Fréttir

Næsti fundur Zetadeildar verður haldinn í Seljateigi Reyðarfirði mánudaginn 28. september og hefst hann kl. 18.00. Aðalefni fundarins er Hjálparstarf og samvinna og mun Sigríður Herdís Pálsdóttir starfsmaður Rauða krossins á Austurlandi flytja erindi. Boðið verður upp á léttan kvöldverð og kostar hann 1500 kr. Verið nú duglegar að mæta á áhugaverðan og skemmtilegan fund.

  Fundurinn okkar var afar fróðlegur. Lára G. Oddsdóttir flutti okkur orð til umhugsunar og fjallaði meðal annars um íhugun og mátt bænarinnar. Þá fengum við góðan gest til okkar á fundinn, Eymund bónda í Vallanesi sem framleiðir lífrænt ræktað grænmeti og bygg. Hann  leiddi okkur í allan sannleik um hollustu lífrænt ræktaðra afurða og gaf okkur að smakka á ýmsum afurðum sínum. Við fengum bankabyggbuff, steikt rauðrófusalat og kartöflur með steinselju og var þetta afar ljúffengur matur. Eymundur framleiðir einnig nuddolíur sem hann blandar íslenskum jurtum undir vörumerkinu Móðir jörð.  Sjá má myndir frá fundinum í myndir frá fundum 2009-10 í undiralbúmi.  

Áætlað er að við Zetakonur hefjum starfið á ný eftir sumarfrí þann 5. september en þá verður fyrsti fundur vetrarins haldinn á Egilsstöðum. Þema næsta vetrar verður ,,Bætum lífið með breyttu hugarfari" en það viljum við hafa að leiðarljósi í starfi okkar næsta vetur.

Þriðjudaginn 5. maí verður fundur undirbúningsnefndar haldinn á Hallormsstað. Mæting í Hallormsstaðaskóla kl. 17.00. Zetakonur búsettar á Héraði eru sérstaklega hvattar til að mæta.  

Næsti fundur Zetadeildar verður á Egilsstöðum mánudaginn 27. apríl kl. 18.00 Við hittumst á bílaplani við Selskóg kl. 18.00. Förum síðan  í stutta göngu í Selskógi. Verði breytingar á þessum áformum verða send út skilaboð um það. Kl. 19.00 er kvöldverður á Kaffi Nielsen og þar snæðum við humarsúpu og nýbakað brauð. Verð kvöldverðar er 1500 kr. Á fundinum verður  Elín Jónsdóttir tekin inn í deildina. Við munum ræða landsþingið og fleira. Vonast til að sjá ykkur allar á fundinum. Með vorkveðju, Jarþrúður.

Fundurinn okkar 21. mars tókst hið besta og það voru ánægðar konur sem héldu heimleiðis frá Neskaupstað í blíðviðri eftir hádegið. Við hófum fundinn í Jósafatshúsi þar sem Magni Kristjánsson leiddi okkur um söfnin þrjú, Málverkasafn Tryggva Ólafssonar, Sjóminja- og smiðjusafnið og Náttúrugripasafnið. Magni sagði skemmtilega frá og við nutum hverrar stundar. Eftir um fjörtíu mínútna safnaskoðun héldum við yfir í Egilsbúð og þar flutti Björg Þorvaldsdóttir orð til umhugsunar þar sem hún fjallaði um þrjár bækur sem hún hefur á náttborðinu sínu um þessar mundir en allar tengjast þær ferðalögum á einhvern hátt. Við ræddum ýmis félagsmál og meðal annars Landsþing samtakanna sem haldið verður á Hallormsstað 16. - 17. maí næstkomandi. Upplýsingar um skráningu og fleira varðandi þingið má sjá á slóðinni:http://dkg.muna.is/is/moya/page/landsambandsthing_2009  Jarþrúður og Helga Magnúsdóttir stjórnuðu inntökuathöfn þegar þær Guðrún Ármannsdóttir og Hildur Magnúsdóttir voru teknar inn í deildina. Elfar Jónsson sem stýrir Mýrinni deild úr Nesskóla sem ætluð er nemendum með sérstakar þarfir sagði okkur frá starfinu þar. Þennan dag var yndislegt veður og ekkert hægt að kvarta yfir færð. Hins vegar voru 9 félagskonur fjarverandi vegna ýmissa ástæðna. Næsti fundur verður haldinn á Egilsstöðum mánudaginn 27. apríl kl. 18.00.                                                              Jarþrúður Ólafsdóttir  

Kæru Zetakonur. Nú er komið að því að hittast á ný. Farið er að birta verulega og nú er veðurspáin mjög góð og vonandi að hún standist fyrir laugardaginn en þá ætlum við að hittast í Neskaupstað. Þær Norðfjarðarkonur Björg, Halla og Steinunn hafa skipulagt fundinn fyrir okkur af kostgæfni. Dagskrá fundarins er eftirfarandi: Mæting í Neskaupstað kl. 11:00 í Jósafatssafn – stendur fyrir neðan Egilsbúð – vel merkt. Þar munum við skoða safnið sem inniheldur hvorki meira né minna en þrjú söfn; Málverkasafn Tryggva Ólafssonar, Náttúrugripasafn og að sjálfsögðu safn Jósafats Hinrikssonar.   Um 11:30 höldum við í Egilsbúð þar sem við fundum og borðum léttar veitingar. Í boði er létt kjúklingasalat ásamt súpu. Góðgerðirnar kosta 1450 kr. Á fundinum verða: Orð til umhugsunar Inntaka nýrra félaga, tvær konur verða teknar inn í deildina okkar. Félagsmál - m.a. umræða um Landsþingið á Hallormsstað í vor.   Að lokum mun Elvar Jónsson kennari kynna starfsemi „Mýrarinnar“ sem er hluti af Nesskóla.   Verið duglegar að mæta, oft var þörf en nú er nauðsyn!   Kær kveðja, Jarþrúður.

Gleðilegt nýtt ár. Eftir jólaannríki, taka þorrablótin við hvert af öðru hér á Austurlandi og fyrir þær konur sem standa í nefndarstörfum er það ærin vinna. Veður eru einnig oft válynd á þessum árstíma og því tóku Zetakonur þá ákvörðun snemma í haust að leggja ekki í fundi frá því í desember og fram í mars. Veður í janúar var þó alls ekki sem verst hér á Austurlandi þetta árið. En nú er sem sé blásið til leiks á ný. Við hefjum undirbúning bæði að okkar eigin fundum og svo landsþinginu sem haldið verður á Hallormsstað í maí. Að mörgu er að hyggja og nauðsynlegt að allar konur deildarinnar komi að undirbúningi þingsins. Stjórnarfundur er boðaður í Zetadeild föstudaginn 13. febrúar á Kaffihúsi Hebu. Deildarfundur verður haldinn laugardaginn 21. mars kl. 11.00 á Neskaupstað. Stefnan er sett á Jósafatssafnið. Sjáumst hressar, kær kveðja, Jarþrúður.    

Í kvöld var haldinn jólafundur Zetadeildar á Kaffihúsinu hjá Marlín á Reyðarfirði. Sérstakur gestur fundarins var Ingibjörg Einarsdóttir sem aðstoðaði við inntöku þriggja nýrra félagskvenna í deildina. Anna Þóra Baldursdóttir sendi góðar kveðjur á fundinn en hún átti ekki heimangengt í dag. Margar félagskonur komust ekki á fundinn, vegna veðurs og veikinda. Á fundinum flutti Jórunn ritari deildarinnar orð til umhugsunar og fjallaði hún um jólahald á heimili sínu í æsku. Jarþrúður las jólasöguna Gjafir vitringanna í forföllum Helgu M. Steinsson sem ætlaði að kynna bókina um Önnu á Hesteyri í Mjóafirði en varð að játa sig veðurteppta í Neskaupstað og síðan sagði Ingibjörg Einarsdóttir frá landssamtökunum og ýmsu fleiru sem tengist starfi Delta Kappa Gamma. Ingibjörg afhenti deildinni fjóra litla gyllta kertastjaka til að nota við inntöku nýrra félaga að gjöf. Jarþrúður veitti þeim viðtöku og þakkaði Ingibjörgu. Eftir að hafa snætt ljúffengan mat hjá Marlín var farið á Stríðsárasafnið í Kampinum á Reyðarfirði. Það var gaman að skoða safnið sem er til húsa í bröggum í Kampinum á Reyðarfirði. (Sjá myndir frá fundinum í myndasafni). Við sem komum af Héraði vorum á fjórum bílum og fórum í samfloti heim í leiðindaveðri á Fagradal. Það er ekki einleikið hvað veður setur oft strik í reikninginn í deildarstarfinu í Zetadeild. En svona er Ísland í dag! Næsti fundur Zetadeildar verður í mars.

Næsti fundur í Zetadeild verður haldinn þann 8. desember kl. 18.00 - 20.00 á kaffihúsinu Hjá Marlín á Reyðarfirði. Við fáum væntanlega góða gesti á fundinn en fram mun fara inntaka nýrra félaga. Fjórar konur ætla að ganga til liðs við okkur. Efni fundarins að öðru leyti er hefðbundið, orð til umhugsunar sem Jórunn Sigurbjörnsdóttir flytur og aðalefni fundarins er bókaspjall sem Ólöf Magna Guðmundsdóttir stýrir. Boðið verður upp á fiskrétt, nýtt brauð og salat (1500 kr á mann). Verið nú duglegar að mæta kæru félagar og eiga saman skemmtilega samverustund.                                                         Jarþrúður Ólafsdóttir